Onlarla insan həlak oldu, itkin düşənlər var | Filippin

Göyərtəsində 359 nəfər olan sərnişin bərəsi Filippin sahillərində batıb.

Cənubdakı Basilan əyalətinin sularında yanvarın 26-sı səhər tezdən adalararası gəminin batması nəticəsində ən azı 18 cəsəd tapılıb, 24 nəfər isə itkin düşüb.

Bərə Zamboanqa Limanından Jolo adasına gedirmiş. Xilasetmə xidmətləri təxminən 316 nəfəri təxliyə edib.

Sahil mühafizəsi dəstəsinin komandiri Roni Qavan qəza zamanı hava şəraitinin əlverişli olduğunu bildirib.

“Axtarış və xilasetmə əməliyyatı hazırda davam edir. Lakin deməliyəm ki, gəmi həddindən artıq yüklənməyib. Onun maksimum sərnişin tutumu 350 nəfərdir. Gəmidə olan faktiki sərnişin sayı isə kapitanın təqdim etdiyi rəsmi siyahıya əsasən 332 nəfərdir. Sahil mühafizəsi gəmidə olan dəniz müfəttişindən təcili yardım çağırışı aldıqdan dərhal sonra hərəkətə keçib. Hazırda yenidən əsas diqqətimiz axtarış və xilasetmə işlərinə yönəlib, çünki insanların həyatı hər şeydən vacibdir”, – R.Qavan qeyd edib.

Fövqəladə hal barədə ilk məlumat verən bərədəki təhlükəsizlik işçisi olub.

Hadisənin səbəbləri araşdırılır.