Pakistanda qatar yoluna qoyulan bomba dəhşətli faciə törətdi - Baku TV

Pakistanın Bəlucistan əyalətində hərbçiləri daşıyan qatar keçərkən dəmir yolu yaxınlığında bomba partlayıb, azı 24 nəfər ölüb, 50 nəfər yaralanıb.

“Agence France-Presse” agentliyinin xəbərinə görə, hadisə Kvetta şəhərində baş verib. Partlayıcı qurğu qatarın son dayanacağına təxminən 1 kilometr qalmış işə düşüb.

Güclü partlayışdan sonra qatarın iki vaqonunun aşdığı və alovlandığı, ərazidən qalın qara tüstünün yüksəldiyi bildirilib. Hadisə yerinin yaxınlığında park edilmiş avtomobillərə də ziyan dəyib.

Bəlucistan hökumət rəsmisi Babar Yousafzai bildirib ki, hakimiyyət orqanları partlayışın səbəblərini araşdırır, lakin əlavə məlumat verməyib.

Hadisə yerindən yayılan görüntülərdə yaxınlıqdakı binaların dağıldığı, insanların aşmış vaqonların üzərinə çıxaraq içəridə qalanlara kömək etməyə çalışdığı əks olunub.