Parisi BTQ-nin Romadakı konfransı hərəkətə gətirdi?

Fransanın Korsika adasında, Haute-Korse bölgəsində genişmiqyaslı əməliyyat keçirilib. Fransa bunu 2023-cü ildə törədilən terror aktları ilə əlaqələndirib.

İddiaya görə, Korsikadakı partlayışları adanın Milli Azadlıq Cəbhəsi törədib. Əməliyyatlarda 10 nəfər saxlanılıb.

Fransa Milli Antiterror Prokurorluğu bəyan edib ki, əməliyyat istintaq hakiminin qərarı ilə həyata keçirilib və saxlanılanlar müvəqqəti həbs olunub.

İddiaya görə, saxlanılanlar Korsikanın müstəqilliyi və milli azadlığı uğrunda mübarizə aparan qruplarla əlaqəli şəxs kimi tanınan Şarl Piyeriyə yaxın adamlardır.

Bir daha xatırladaq ki, Korsikada partlayışlar 2023-cü ildə baş verib, antiterror əməliyyatı isə 2025-ci il mayın 20-də baş tutub. Analitiklər bunu rəsmi Parisin yeni repressiya dalğası kimi qiymətləndirirlər.

Ekspertlər iddia edirlər ki, mayın 13-də Romada Bakı Təşəbbüs Qrupu və Korsikanın müstəqilliyi uğrunda mübarizə aparan “Nazione” Hərəkatının birgə təşkilatçılığı ilə keçirilən konfrans da Fransanı qəzəbləndirə bilər. Çünki tədbirdə Fransanın müstəmləkə siyasətindən əziyyət çəkən Korsika xalqının qarşılaşdığı əsas problemlər qaldırılıb.

Həmçinin Korsika milli kimliyinin və Korsika dilinin Fransa hökuməti tərəfindən məqsədli şəkildə assimilyasiya edilməsi siyasəti kəskin pislənib.

Konfrans zamanı Bakı Təşəbbüs Qrupu və “Nazione” Hərəkatı arasında əməkdaşlıq memorandumu da imzalanıb.