Parlament sədrindən ABŞ-yə xəbərdarlıq | İranda nə baş verir? - Baku TV

İranın paytaxtı Tehranda nümayiçilərlə hüquq-mühafizə orqanları arasında baş verən silahlı toqquşmalar zamanı 26 ev, 34 məscid, 40 bank və 15 ticarət mərkəzi yandırılıb.

Tehran Yanğın Təhlükəsizliyi İdarəsindən bildirilib ki, hökumətə aid 13 bina və 50 nəqliyyat vasitəsi də alova qərq olub.

İranda baş verən iğtişaşlar nəticəsində Hüquq-Mühafizə Orqanları Komandanlığının xüsusi bölmələrinin 8 hərbçisi həlak olub.

Qeyd olunub ki, silahlı insident yaradanlardan 200-ü həbs olunub. Onların sığınacaqlarından xeyli miqdarda döyüş sursatı, silah, qumbara və "Molotov kokteylləri" müsadirə edilib.

İsrail ABŞ-nin İrandakı vəziyyətə müdaxilə etmə ehtimalı ilə əlaqədar yüksək hazırlıq vəziyyətindədir. Belə bir məlumatı "Reuters" agentliyi yayımlayıb. Vurğulanıb ki, ABŞ Prezidenti Donald Tramp İranı dəfələrlə müdaxilə ilə hədələyib və hökuməti nümayişçilərə qarşı güc tətbiq etməkdən çəkindirməyə çalışıb.

Rəsmi Tehranın cavabı özünü çox gözlətməyib. İran parlamentinin sədri Məhəmmədbaqer Qalibaf ABŞ-yə xəbərdarlıq edib. Onun sözlərinə görə, əgər Birləşmiş Ştatlar İrana hücum etsə, amerikalıların nəzarətə götürdüyü ərazilər və onların hərbçiləri qanuni hədəfə çevriləcək.