Pentaqon həyəcan təbili çaldı

ABŞ Müdafiə Nazirliyi artıq az sayda, lakin çox bahalı silah almaq praktikasından tədricən uzaqlaşır və çoxlu sayda ucuz silah istehsalı prinsipinə keçir.

Yüksək vəzifəli Amerika hərbçilərinin fikrincə, ABŞ ilə Çin arasında Tayvan uğrunda müharibə bu onilliyin sonuna qədər başlaya bilər.

"Business Insider” nəşrinin yazdığına görə, Pentaqonda anlayırlar ki, hazırkı raket ehtiyatları belə bir münaqişə zamanı cəmi bir neçə günə tükənə bilər.

"Hərbi ssenarilər göstərdi ki, Tayvan uğrunda qızğın döyüşlər zamanı ABŞ Ordusu uzaqmənzilli, yüksək dəqiqlikli sursatlarını bir həftədən az müddətdə sərf edə bilər. Bu zaman belə sursatların istehsalını və tədarükünü artırmaq həm sənaye, həm də büdcə üçün ciddi yük yaradacaq", − deyə məqalədə qeyd olunur.

Pentaqon bu nəticəyə Yaxın Şərqdəki toqquşmalar, eləcə də Ukrayna müharibəsi zamanı qarşılaşdığı mənzərədən sonra gəlib.

Məsələ ondadır ki, Yəməndəki husilər və İranla yaşanan gərginlik, həmçinin Rusiya-Ukrayna müharibəsi zamanı ABŞ-nin zenit-raket ehtiyatları, xüsusən "Patriot” sistemləri üçün raketlər sürətlə azaldı.

Bu problemi aradan qaldırmaq üçün Amerika müdafiə şirkətləri indi daha sadə və ucuz silah istehsalına yönəlirlər.

Ekspertlər bildirirlər ki, bu tendensiya ABŞ müdafiə sənayesində yeni mərhələnin başlanğıcıdır. Artıq məqsəd az sayda texnoloji cəhətdən mükəmməl silah deyil, çoxlu sayda etibarlı və münasib qiymətli sursat istehsal etməkdir.