Pişəvər şəhərindəki partlayış və atışmada həlak olanlar var

Pakistanın Pişəvər şəhərində polis idarəsini partlatmaq istəyən 3 terrorçu məhv edilib. Lakin terrorçulardan biri özünü polis idarəsinin girişində partlatdığı üçün 3 polis əməkdaşı da həlak olub.

Bu barədə Pişəvər Şəhər Polis İdarəsinin həkim əməkdaşı Mian Səid məlumat verib.

Partlayışdan sonra digər iki terrorçu polis idarəsinə daxil olmağı bacarıb, amma hüquq-mühafizə orqanının əməkdaşları silahlı atışma zamanı onları zərərsizləşdiriblər.

Bu toqquşma zamanı isə iki polis yaralanıb. İnsident zamanı 6 mülki şəxs də xəsarət alıb və onlar dərhal xəstəxanaya yerləşdirilib. Hazırda ərazidə mümkün təhdidlərin qarşısını almaq üçün təhlükəsizlik tədbirləri həyata keçirilir.

Qeyd edək ki, Pakistanda son terror aktlarının arxasında “Taliban” və Hindistanın dəstəklədiyi “Fitnə Əl Xəvaric” qruplaşması dayanıb. Budəfəki partlayışa görə isə məsuliyyəti üzərinə götürən olmayıb. Pakistanın təhlükəsizlik xidməti terrorçuların şəxsiyyətini və hansı qruplaşmaya aid olduqlarını müəyyənləşdirməyə çalışır.