Putin gözləmədiyi qədər çətin durumda | Ölkələr ondan kritik cavabı gözləyir

Böyük Britaniya və Fransa Rusiya Prezidenti Vladimir Putini Ukraynada atəşkəs danışıqlarını dayandırmaqda ittiham edib və Moskvaya dərhal cavab verməsi üçün təzyiqləri artırıb.

Bu barədə “Associated Press” məlumat yayıb.

Britaniya xarici işlər naziri Devid Lemmi fransalı həmkarı Jan-Noel Barro ilə söhbətindən sonra jurnalistlərə deyib:

“Fikrimizcə, Vladimir Putin çaşqınlıq yaradır, o dayanıb”.

Britaniya və Fransa Ukraynada gələcək sülhə nəzarət üçün koalisiya yaratmağa çalışır.

D.Lemmi bildirib ki, V.Putin atəşkəsə razı olduğunu söyləsə də, Ukraynanı bombalamağa davam edir.

Jan-Noel Barro da xatırladıb ki, Ukrayna üç həftə əvvəl atəşkəs şərtləri ilə razılaşıb və indi Rusiya ABŞ-yə cavab verməlidir. Fransanın baş diplomatı vaxtın daraldığını bildirərək Rusiya liderini çevik cavab verməyə çağırıb.

Nazirlər həmçinin vurğulayıblar ki, Rusiyanın hərbi kampaniyasını dayandırmaq niyyəti yoxdur. Jan-Noel Barro və Devid Lemmi bu kontekstdə Vladimir Putinin həftənin əvvəlində 160 min çağırışçının hərbi xidmətə çağırılması barədə fərmanını misal göstərib.