Putin niyə müharibəyə möhtacdır? - Rusiya savaş hesabına "nəfəs alır", çünki...

“Ukrayna ilə savaş Rusiya iqtisadiyyatı üçün çətinliklər yaradıb və ağır böhran təhdidi mövcuddur. Amma Kremlin geri dönüş etmək fikri yoxdur. Heç Donald Trampın cəlbedici təklifləri də Vladimir Putini müharibə mülahizələrindən uzaqlaşdırmır. Görünür, Putin konfliktin davam etməsini yox, məhz yekunlaşmasını özü üçün riskli sayır”.

Bu fikirlər Polşanın Totalitar Tədqiqatlar Mərkəzinin dosenti Yan Qarnerə aiddir.

Onun “Foreign Policy”də paylaşılan yazısında qeyd olunub ki, Kurskdakı uğurlu əməliyyatlar da Rusiyanın gələcəkdə Ukrayna üzərində qələbə qazanması demək deyil. Əksinə, Rusiyanın resursları tükənir. Bura texnika və şəxsi heyət də aiddir:

“Bəlkə də Putin cəbhədə Ukraynaya təzyiq göstərməklə savaşı öz şərtləri ilə bitirəcəyinə inanır. Bu da istisna deyil. Amma onun müharibəni dayandırmamağının əsas səbəbi başqadır”. Analitikin fikrincə, əsas səbəb Rusiyada Vladimir Putin hakimiyyətinin sona çatmasıdır. Çünki Rusiya iqtisadiyyatındakı artım tempi müdafiə sənayesinə yönləndirilən astronomik məbləğdə maliyyə ilə bağlıdır:

“Sülh sazişinin imzalanması hərbi xərclərin azaldılmasına gətirəcək, bu isə Rusiya iqtisadiyyatı üçün ağır zərbə olacaq. Yəni hazırkı Rusiya iqtisadiyyatı savaşsız, yaxud ordunu müharibəyə hazırlamaq üçün ayrılan vəsaitlər olmadan mövcud ola bilməz. Ölkə iqtisadiyyatı münaqişənin hesabına nəfəs alır. Bu konfliktin sayəsində regionlara da pul ayrılır. Əks halda isə bölgələr böyük etiraz dalğasına bürünəcək”.

Y.Qarnerin fikrincə, Putin üçün Rusiya iqtisadiyyatının gələcəyi Ukrayna ilə müharibənin fəsadlarından daha qorxuludur. Buna görə də iqtisadi vəziyyət düzəlməyənə qədər savaş davam edəcək.