Qərbin budəfəki yardımı necə istifadə ediləcək? | Ukrayna Baş naziri detalları açıqladı

Ukrayna ABŞ-dən 1,35 milyard dollar həcmində qrant alıb.

Bu barədə sosial media şəbəkəsində bildirən ölkənin Baş naziri Denis Şmıqal qeyd edib ki, bu vəsait humanitar və sosial proqramlara yönəldiləcək.

Onun sözlərinə görə, Vaşinqton bu qrantı Beynəlxalq İnkişaf Agentliyinin vasitəsilə Kiyevə verib. Beləliklə, 2022-ci ilin fevralından bəri Qərbin Ukraynaya maliyyə yardımının həcmi ümumilikdə 100 milyard dolları ötüb.

“Politico” nəşrinin məlumatına görə, səlahiyyət müddəti başa çatmaq üzrə olan Cozef Bayden administrasiyası Konqresin Kiyev üçün ayırdığı 6 milyard dolları Donald Trampın andiçmə mərasiminədək Ukraynaya yönəltməyi planlaşdırır.

Ali Rada Ağ Evin yardımın verilməsinin sürətləndirməsi cəhdlərini həyəcan siqnalı kimi qiymətləndirib. Belə ki, Trampın andiçmə mərasimindən sonra vəziyyət kəskin şəkildə dəyişə bilər.

Kiyev dəfələrlə etiraf edib ki, ölkə müstəqil olaraq yalnız hərbi büdcə xərclərini ödəyə bilir və digər sahələr müttəfiqlərinin köməyi ilə maliyyələşir. Hökumət 2025-ci il üçün büdcə layihəsini 1,6 trilyon qrivna, yəni 38,68 milyard dollar kəsirlə Radaya göndərib.