Qəzzada 514 min insan aclıqdan əziyyət çəkir, İsrail isə...

“Bazarda 4-5 aydır ki, ət tapılmır. Yumurta satılmır. Qəzza sakinləri süd üzünə də həsrət qalıblar”.

Bu sözlər Beyt Hanundan Qəzza şəhərinə köçürülən Həsən Əbu Odehə məxsusdur. O bildirib ki, həyatda qalmaq üçün lazım olan ərzaq məhsullarının heç biri bazarda satılmır.

Digər problem isə məhsulların dollarla satılması və süni qiymət artımıdır. Sakinlərin dediyinə görə, unun bir kiloqramı 70-80 dollar, təxminən 130 manatdır.

Qəzza zolağının inzibati mərkəzi sayılan Qəzza şəhərinin bazarları da boş qalıb, demək olar ki, heç nə satılmır. Ümumdünya Aclıq Monitorinq Mərkəzi Qəzzadakı vəziyyəti fəlakətli adlandırıb. Orada yaşayan fələstinlilərin acından ölməməsi üçün İsrailə təzyiqlərin artırılması tələb olunur.

514 min fələstinli aclıqdan əziyyət çəkir. Sentyabrın sonuna qədər aclıqdan əziyyət çəkən fələstinlilərin sayı 641 minə çata bilər. Qida çatışmazlığı ilə üzləşənlərin 280 mini Qəzzanın şimalında yaşayır. Problem zolağın mərkəzi və cənub bölgələrində də hiss olunacaq.

İsrail isə son hesablatları rədd edib və bu yalan məlumatların HƏMAS tərəfindən ötürüldüyünü bildirib.