Qəzzada səhiyyənin bərpası neçəyə başa gələcək?

“Qəzza zolağının səhiyyə sisteminin bərpasının xərcləri azı 7 milyard dollar olacaq”.

Bunu Ümumdünya Səhiyyə Təşkilatının (ÜST) baş direktoru Tedros Adhanom Qebreyesus Cenevrədə keçirilən brifinqdə deyib.

“Qəzzanın səhiyyə sisteminin bərpasının ümumi xərci azı 7 milyard dollar olacaq”, ‒ deyə o bildirib.

ÜST rəhbərinin sözlərinə görə, təşkilat əvvəllər 41 xəstənin və 145 müşayiətçinin bir neçə ölkəyə təxliyəsinə kömək edib. Lakin Qəzzadan kənarda müalicəyə ehtiyacı olan 15 000 xəstə var, o cümlədən 4000 uşaq.

O əlavə edib ki, 700-dən çox insan təxliyə olunmadan həyatını itirib.

BMT, Aİ və Dünya Bankının əməliyyat hesablamalarına görə, Qəzzanın bərpası təxminən 70 milyard dollar tələb edəcək və bütün ərazilər bərpa olunmayacaq.

Bu arada, İsrail hökuməti Beynəlxalq Ədalət Məhkəməsinin BMT-nin Yaxın Şərqdəki Fələstin Qaçqınları üçün Yardım və İş Agentliyinin sakinlərə yardım göstərmək üçün Qəzza zolağına daxil olmasına dair qərarını rədd edir. Bunu İsrailin xarici işlər naziri Gideon Saar bildirib.

Onun sözlərinə görə, agentliyin işçiləri arasında 7 oktyabr 2023-cü ildə İsrailə hücumda iştirak edənlər də daxil olmaqla, HƏMAS hərəkatından olan fələstinli radikallar var.

“Biz 7 oktyabr 2023-cü ildəki qırğında iştirak edən təşkilatla əməkdaşlıq etməyəcəyik. BMT agentliyinin terrorçularla dolu olması dəhşətli və utancvericidir. Sözügedən təşkilat hələ də 1400-dən çox HƏMAS yaraqlısını işə götürür. Dünyada heç bir qurumun bunu İsrailə tətbiq etmək hüququ yoxdur. Bu pis tərəfdaşlıq strukturu hazırda sözdə BMT məhkəməsinin arxasında gizlənir. Sistem kökündən çürüyüb”, ‒ deyə İsrailin xarici işlər naziri əlavə edib.