Qida borusunun xərçəng riski üç dəfəyədək arta bilər

Həddindən artıq isti çay və ya qəhvə içmək qida borusu xərçənginin yaranma ehtimalını üç dəfəyə qədər artıra bilər.

Böyük Britaniyadan olan təxminən bir milyon insanın iştirak etdiyi genişmiqyaslı tədqiqatdan sonra alimlər bu qənaətə gəliblər.

Mütəxəssislər müəyyən ediblər ki, əsas rolu içkinin miqdarı deyil, məhz onun temperaturu oynayır. Həddindən artıq isti içkilər qəbul edən şəxslərdə yastıhüceyrəli qida borusu xərçənginə tutulma riski əhəmiyyətli dərəcədə yüksəkdir.

Bununla belə, isti içkilərin adenokarsinomaya heç bir təsiri yoxdur. Oksford Universiteti əməkdaşları tərəfindən həyata keçirilən araşdırma 14 il davam edib.

İştirakçılardan çay və ya qəhvəni necə – çox isti, isti, yoxsa ilıq halda içməyi üstün tutduqları soruşulub. Məlum olub ki, hər gün altı və daha çox qaynar fincan içki qəbul etmək bu xəstəlik riskini 71% artırır. Bu baxımdan ekspertlər içkiləri rahat içiləcək temperatura qədər soyutmağı məsləhət görürlər.