"Hücum olarsa..." | Tehran müharibədə hansı üsullardan istifadə edəcək? - Baku TV

“ABŞ zərurət yaranarsa, İrana yeni zərbə endirməyə hazırdır”.

Bunu ABŞ Prezidenti Donald Tramp Ağ Evdə jurnalistlərin suallarını cavablandırarkən bildirib.

“Ola bilsin ki, biz onlara növbəti böyük zərbəni endirməli olacağıq. Hələlik əmin deyiləm”, – deyə o əlavə edib.

İrana hücumlar yenidən başlasa, ABŞ-yə qarşı “yeni cəbhələr” açılacaq. Bu barədə ISNA agentliyi İran Ordusunun rəsmi nümayəndəsinə istinadla məlumat yayıb.

Onun sözlərinə görə, əgər ABŞ İrana növbəti dəfə hücum etmək fikrinə düşsə, Tehran yeni silahlar və yeni metodlardan istifadə edərək adekvat cavab verəcək.

Bu arada, İranın xarici işlər nazirinin müavini Kazım Qəribabadi bildirib ki, ABŞ-nin hücumları dayandırmasına səbəb kimi danışıqlara şans verdiyini bəyan etməsi təhdid formasında sülh təklifidir. O bunu “X” sosial şəbəkə hesabında yazıb.

Qəribabadinin sözlərinə görə, iranlılar ölümü nəzərə alaraq qələbəyə kökləniblər.

“İran həmrəy və qətiyyətli şəkildə istənilən hərbi müdaxiləyə qarşı durmağa hazırdır”, – deyə nazir müavini paylaşımında yazıb.