"The New York Times"dan Ermənistan açıqlaması

ABŞ və Avropa İttifaqı Ermənistanın Rusiyaya sanksiyalardan yan keçməkdə kömək etməsindən və bu ölkəyə təkrar ixrac yolu ilə qadağan olunmuş məhsulları tədarük etməsindən narahatdır. Bu barədə "The New York Times" nəşrinin məqaləsində deyilir.

Məlumata görə, ABŞ Sənaye və Təhlükəsizlik Bürosunun sənədlərindən birində qeyd olunub ki, 2022-ci ildə Ermənistan 2021-ci ilə nisbətən ABŞ-dən 515 faiz, Avropa İttifaqı ölkələrindən isə 212 faiz daha çox çip və prosessor idxal edib və onların da 97 faizini Rusiyaya ixrac edib. Ukrayna müharibəsinin davam etdiyi bir zamanda ABŞ və müttəfiqləri Rusiyaya birbaşa olaraq çip satmır.

Məqaləyə görə, ABŞ rəsmiləri bəyan edirlər ki, Rusiya yüksək dəqiqliyə malik silahlar üçün komponentlərin böyük hissəsini artıq istifadə edib və onları keyfiyyətsiz və ya saxta komponentlərlə əvəz etmək məcburiyyətindədir ki, bu da silahların dəqiqliyini azaldır. “Lakin ticarət statistikası göstərir ki, digər ölkələr Rusiyanı ehtiyac duyduqları ilə təmin etmək üçün işə qarışıblar”, – deyə məqalədə qeyd edilib.

Rusiyanın məhdudiyyətlərdən yayınmaq cəhdlərinin qarşısını almaq üçün ABŞ və tərəfdaşları Rusiya, İran, Çin, Kanada və digər ölkələrdə onlarla şirkət və təşkilata qarşı sanksiyalar tətbiq edərək öz qaydalarını daim sərtləşdiriblər. Ancaq məqalədə də qeyd edildiyi kimi, proses hələ də müvəffəqiyyətlə davam edir.