Rusiya Donbasla bağlı məqsədinə çata bilmir?

Rusiyanın yaxın aylarda Ukraynanın Donbas bölgəsini tamamilə ələ keçirəcəyi barədə bəyanatları yerdəki real vəziyyəti əks etdirmir.

Bu barədə ABŞ-nin Müharibə Araşdırmaları İnstitutu (ISW) məlumat yayıb.

Amerikalı analitiklər hərbi komandanlığın Rusiya Prezidenti Vladimir Putini payıza qədər bütün Donbası ələ keçirməyin mümkünlüyünə inandırdıqları barədə məlumatları belə şərh ediblər: “Rusiyanın şişirdilmiş ərazi ambisiyaları və aqressiv ərazi tələbləri döyüş meydanındakı reallığa uyğun gəlmir”.

ISW-nin fikrincə, hazırda Rusiya Ordusunun bütün Donbası nə vaxt ələ keçirə biləcəyi barədə proqnoz vermək mümkün deyil.

Rusiyanın irəliləyişinin yavaşlaması və Ukraynanın nəzarətində olan ərazilərin mürəkkəb təbiəti səbəbindən rus ordusunun bunu necə edə biləcəyi naməlumdur.

Analitiklər qeyd ediblər ki, Rusiya ilin əvvəlindən Donetsk vilayətində cəmi 349,89 kvadratkilometr ərazini işğal edib. Ukrayna ordusunun istehkamları, çətin coğrafi relyef, eləcə də əks-hücumları və bütün cəbhə xətti boyunca Rusiyanın hücum əməliyyatlarına mane olan ortamənzilli zərbə kampaniyası rusların Donetsk vilayətinin qalan hissəsini ələ keçirmək perspektivlərini zəiflədir.

ABŞ institutu başqa bir detala diqqət çəkib – Ukraynanın cənubdakı əks-hücumları Rusiyanı Donbas da daxil olmaqla, öz qüvvələrini cəbhənin müxtəlif istiqamətlərində bölüşdürməyə və müdafiəyə çəkilməyə məcbur edib.

Analitiklər əlavə ediblər ki, Ukrayna Ordusunun uğurlu irəliləyişi Rusiyanın planlarını pozur və ya onları dəyişdirmək məcburiyyətində qoyub.