Rusiya hansı taktika ilə Ukrayna qüvvələrini geri çəkilməyə məcbur edir? - Baku TV

Ukraynada döyüşən artilleriyaçılar bildirirlər ki, cəbhə xəttində artıq demək olar ki, atdıqları hər addımı düşmənin pilotsuz uçuş aparatları müəyyənləşdirir.

Milli Qvardiyanın 15-ci briqadasının heyəti sovet istehsalı olan qoşqulu haubitsanı dəfələrlə gizlətməyə məcbur olub. Səbəb isə başlarının üzərində dövrə vuran dronlardır. Bu da atəş tapşırıqlarının gecikməsinə gətirib çıxarır.

Ukrayna Milli Qvardiyasının haubitsa komandiri bildirib:

“Biz artıq səmanı daha diqqətlə izləməli, daha yaxşı gizlənməli və daha ehtiyatlı davranmalıyıq. Çoxları deyir ki, artilleriya artıq öz əhəmiyyətini itirib. Mən bununla razı deyiləm. Onun hələ də üstünlükləri var. Taktika dəyişib və artilleriyadan əvvəlki qədər istifadə olunmur. Amma o, hələ də effektivdir və elə vəziyyətlər olur ki, tapşırığı yalnız artilleriya yerinə yetirə bilir”.

Hərbçilər bildirirlər ki, döyüşlərin intensivliyi səbəbindən siyasi prosesləri izləməyə demək olar ki, vaxt qalmır. Onların sözlərinə görə, yalnız bəzən Zaporojyedə yaşayan yaxınları ilə telefonla danışa bilirlər. Dobropolya şəhərində də aylardır davam edən çətin döyüş vəziyyəti hərbçiləri xeyli yorub.

Hərbçilərin sözlərinə görə, dron təhlükəsinin artması logistikanı ciddi şəkildə çətinləşdirir və Ukraynanın müdafiə mövqelərini saxlamaq imkanlarını zəiflədir.

Hərbçilər xəbərdarlıq ediblər ki, Dobropolyanın itirilməsi Rusiyanın Kramatorsk və Slavyansk şəhərlərinə cinahdan yaxınlaşmasına, həmçinin Dnepropetrovsk vilayəti istiqamətində irəliləməsinə şərait yarada bilər.