Rusiya Kurskdan Ukrayna ordusunu çıxarmağa niyə tələsmir? | Ekspertlərdən açıqlama
Artıq xeyli müddətdir ki, Ukrayna Rusiyanın Kursk vilayətində irəliləyir.
Baş verənlərin nəticəsi kimi Rusiya torpaqlarında ABŞ bayrağı dalğalandırılır, Ukrayna raketlə Rusiyanın yanacaq yüklü bərəsini vurur.
Verilən məlumatlara görə, Ukrayna Ordusunun Hava Hücum Briqadası Kursk vilayətində Rusiya Silahlı Qüvvələrinə məxsus "UAZ"ı pusquya salaraq savaşda üstünlük qazanmağa çalışır. Bütün bunların fonunda Rusiya Kursk vilayətinin dərinliklərindən Ukrayna Ordusunu çıxarmağa sanki tələsmir.
Bəzi analitiklərə görə, Rusiya qoşunları üçün çətin bir vəziyyət yaranıb. Ukraynaya Amerikadan gələn yardımlar mövcud durumu daha da mürəkkəbləşdirir.
Ekspertlər istisna etmirlər ki, Ukraynanın Rusiya ərazilərinə hücumu psixoloji müharibənin bir hissəsidir və həmin əməliyyatları həyata keçirən Ukrayna Ordusu kontingenti isə Qərb koalisiyasının hazırladığı məkrli planların qurbanıdır.
Qərbin Kiyevi “F16”larla, qanadlı raketlərlə təmin etməsi baş verəcək yeni həmlələrin mesajı kimi qiymətləndirilir. Hətta bu yaxınlarda Ukrayna Prezidenti Volodimir Zelenski Qərb liderlərinə müraciət edərək Ukraynaya Rusiya ərazisini vurmaq üçün uzaqmənzilli “Storm Shadow” raketlərindən istifadə etməyə icazə istəyib.
Əlbəttə ki, rəsmi Kiyevin bu cür yeni tələbləri Qərbin prosesdə fəallaşmasına rəvac verdiyi kimi ümid bəslənilən siyasi çözümlərin qarşısında da ciddi əngəllər yaradır.