Rusiya Ordusu Odessaya dronlarla hücum edib

Rusiya Ordusunun Odessa vilayətinə dronlarla endirdiyi hücum Rumıniya sərhəd kəndinin əhalisinin təxliyəsinə səbəb olub.

Bu barədə “Euronews” məlumat yayıb.

Qeyd olunub ki, Rumıniyanın Tulça bölgəsinin Plaur kəndində partlayış riski səbəbindən yerli sakinlərin təxliyə olunduğu bildirilir.

Buna səbəb Rusiya Ordusunun Odessa vilayətinin bir sıra enerji və liman infrastrukturlarına endirdiyi zərbələr nəticəsində İzmail limanında maye qaz daşıyan Türkiyəyə məxsus tankerdə baş verən yanğın olub. Gəminin təxminən 4 min ton mayeləşdirilmiş qaz daşıdığı bildirilir.

Rumıniyanın Fövqəladə Hallar Xidməti hadisə ilə bağlı Ukrayna tərəfi ilə daimi əlaqədə olduqlarını açıqlayıb.

Qurumun məlumatına görə, hazırda Rumıniya xidmətlərinin birbaşa müdaxiləsinə ehtiyac olmasa da, yükün mümkün partlayışı həm Rumıniya, həm də Ukrayna tərəfinə təhlükə yaratdığı üçün təxliyə davam etdirilir.