Rusiya Xarkovu vurdu, türkiyəli jurnalistlər yaralandı

Ukraynadakı müharibəni işıqlandıran Türkiyənin “Anadolu” agentliyinin çəkiliş qrupunun Xarkovda qaldığı hotel raket hücumuna məruz qalıb.

Agentliyin müxbiri David Kaçkaçişvili və fotojurnalist Özge Elif Kızıl binanı tərk etməyə müvəffəq olsalar da, yüngül yaralanıblar. Hər iki media işçisinin səhhətinin qənaətbəxş olduğu bildirilib.

Agentlikdən verilən xəbərə görə, hadisə yanvarın 10-da baş verib. Qeyd edilib ki, partlayışlar nəticəsində binanın mərtəbələri dağılıb.

Xarkov Vilayət Dövlət Administrasiyasının rəhbəri Oleq Sinequbov isə bildirib ki, jurnalistlərin olduğu hotel "S-300" raketləri ilə vurulub. Nəticədə 11 nəfər yaralanıb. Bundan başqa, 30-dan çox mülki vətəndaşın olduğu kompleksə ciddi ziyan dəyib, bir neçə avtomobil yanıb.