Rusiya XİN-dən Ermənistanın KTMT-yə pul göndərməməsinə reaksiya

“Ermənistanın Kollektiv Təhlükəsizlik Müqaviləsi Təşkilatını maliyyələşdirməni dayandırması faciə deyil, təşkilat işini davam etdirir”.

Bu barədə jurnalistlərə Rusiya xarici işlər nazirinin müavini Aleksandr Pankin “Rusiya-İslam dünyası: KazanForum” beynəlxalq iqtisadi forumunda bildirib.

Nazir müavininin sözlərinə görə, maliyyə nöqteyi-nəzərindən KTMT-nin fəaliyyətində elə hallar olub ki, ölkələr ödənişləri bir qədər gecikdirib, hissə-hissə ödəyiblər. Bu hal Ermənistanla da təkrarlana bilər.

"Hərbi-siyasi nöqteyi-nəzərdən Ermənistanın KTMT ilə bağlı gələcək addımları ölkənin milli maraqlarına uyğun olmalıdır. Həm də ölkənin öz təhlükəsizliyini təmin etmək imkanlarına malik olub-olmadığı nəzərdən keçirilməlidir”, – deyə Aleksandr Pankin bildirib.

Xatırladaq ki, Ermənistanın Baş naziri Nikol Paşinyan bir müddət əvvəl bəyan etmişdi ki, ölkəsi KTMT-dəki fəaliyyətini “dondurub”.