Rusiya yeni müharibəyə qoşulur? - ABŞ hərbçilərini Avropadan niyə çıxarır?

ABŞ-nin Avropadakı hərbi kontingenti 30 faizə qədər azaldıla bilər.

“Politico”da yayılan məlumata görə, hazırda Pentaqonda ABŞ-nin dünyadakı hərbi mövcudluğu müzakirə olunur. Ağ Ev hərbi xərcləri azaltmaq niyyətindədir. Diqqət daha çox Hind-Sakit okean regionuna yönəldilə bilər. Çünki orada gərginlik artır.

Almaniyanın xarici siyasət şurasının əməkdaşı Aylin Matlenin fikrincə, ABŞ 20 min hərbçisini Avropadan çıxaracaq.

Qeyd edək ki, həmin hərbçilər Rusiya-Ukrayna savaşı fonunda 2022-ci ildə Cozef Bayden tərəfindən Avropaya göndərilib. Hazırda Avropada 100 min amerika hərbçisinin xidmət etdiyi bildirilir. NATO rəsmilərindən biri isə ixtisarların 20 mindən çox olacağını düşünür. Ən çox narahat olmalı ölkə Almaniyadır. Çünki 35 min amerikalı hərbçi məhz orada yerləşdirilib.

ABŞ-nin hərbçi sayını azaltmaqla bağlı qərarı sentyabrda verəcəyi gözlənilir. O ki qaldı bu gedişdən ən çox Almaniyanın narahat olmasına, kansler Fridrix Merts Avropanın ən güclü ordusuna sahib olmağı hədəfləyib. Almaniya Ukraynaya açıq hərbi yardım edir və birgə istehsal müəssisələri barədə razılıq əldə olunub. Bütün bunlar isə Rusiyanı qıcıqlandırır. Bu səbəbdən bəzi analitiklər Rusiya və Almaniya arasında gərginliyin artacağını proqnozlaşdırırlar. Bu isə Üçüncü Dünya müharibəsinin başlanğıcı kimi yozulur.