Rusiyada neft obyekti vurulub

Rusiya mayın 8-nə keçən gecə Ukrayna ərazisinə müxtəlif tipli pilotsuz uçuş aparatları ilə 850-dən çox zərbə endirib.

Bu barədə Ukrayna Prezidenti Volodimir Zelenski özünün "Telegram" kanalında yazıb.

O qeyd edib ki, ümumilikdə Rusiya tərəfindən Ukrayna mövqelərinə 10 hücum əməliyyatı qeydə alınıb:

"Ötən gecə ərzində Rusiya ordusu Ukrayna mövqelərinə zərbələr endirməyə davam edib. Səhər saat 7-yə olan məlumata görə, cəbhədəki mövqelərə artıq 140-dan çox atəş qeydə alınıb. Rusiyalıların hücum əməliyyatlarının çoxu Slavyansk istiqamətində olub. Cəbhəboyu ərazilər üzərindəki səmada kəşfiyyat dronlarının istifadəsi dayanmayıb. Bütün bunlar onu aydın şəkildə göstərir ki, Rusiya tərəfindən cəbhədə atəşkəs cəhdinin heç imitasiyası da olmayıb".

Zelenski həmçinin bildirib ki, Rusiyanın Yaroslavl şəhərində neft obyekti vurulub. Ukrayna lideri hansı obyektin vurulduğunu açıqlamayıb.

"Telegram"da yayılan məlumatlara görə, Ukrayna dronları Rusiyanın ən böyük hərbi bazalarından birinin yerləşdiyi Qroznı şəhərinin ərazisinə hücum edib. Bildirilir ki, ərazidə azı 2 partlayış baş verib.

Bundan başqa, Ukrayna Baş prokurorunun ofisinin silahlı münaqişə şəraitində törədilən cinayətlərə qarşı mübarizə departamentinin rəisi Yuri Rud bildirib ki, Ukraynada müharibənin əvvəlindən 17,4 mindən çox dinc sakin həlak olub, 43 mindən çox mülki şəxs yaralanıb. Onun sözlərinə görə, 700-dən çox uşaq həlak olub, 2,4 mindən çox uşaq yaralanıb.

Rud qeyd edib ki, hərbi əməliyyatlar nəticəsində 320 mindən çox mülki infrastruktur obyekti zədələnib, bunun 263 mindən çoxu yaşayış evi, 5 mindən çoxu təhsil müəssisəsi və 1,4 mindən çoxu tibb müəssisəsidir.