Rusiyada tibb sahəsində inqilabi kəşf | Vaksinin əsas özəllikləri açıqlandı

Xərçəngə qarşı peyvəndin klinik sınaqlarında iştirak edən ilk xəstələr sözügedən vaksini 2024-cü ilin sonu və ya 2025-ci ilin əvvəlində alacaqlar.

Bu barədə Rusiyanın “Veçernaya Moskva” mətbu orqanına istinadən məlumat yayılıb.

Bildirilib ki, sözügedən inqilabi vaksin Rusiya Səhiyyə Nazirliyinin Milli Tibbi Tədqiqat Radiologiya Mərkəzində Engelhardt Molekulyar Biologiya İnstitutu ilə birlikdə hazırlanıb.

Xəbəri Rusiya Səhiyyə Nazirliyinin baş onkoloqu Andrey Kaprin də təsdiq edib.

Baş onkoloq deyib ki, Rusiya Səhiyyə Nazirliyinin Milli Tibbi Tədqiqat Radiologiya Mərkəzi eyni vaxtda iki istiqamətdə fəal işləyir:

“Birincisi, bədxassəli hüceyrələri məhv edən və eyni zamanda xəstənin antitümör toxunulmazlığını aktivləşdirən dörd qeyri-patogen virusun birləşməsinə əsaslanan onkolitik vaksindir. Onun effektivliyi və təhlükəsizliyi bir sıra sınaqlarla təsdiq edilib. Şiş əleyhinə vaksin onun böyüməsininin qarşısını almaqdan başlayaraq tam məhvinə qədər təsir edir”.

Andrey Kaprin onu da əlavə edib ki, ikinci hədəf xərçəng hüceyrələrini fərdiləşdirilmiş üsulla yaradılan mRNT vaksinlər vasitəsilə məhv etməkdir. Bu metod xəstələrə vərdiş etdiyimiz kimyaterapiyaları tətbiq etməklə deyil, onların vəziyyətini nəzərə alaraq fərdi yanaşma imkanı yaradacaq.

Baş onkoloqun sözlərinə görə, yeni peyvənd molekulyar səviyyədə fəaliyyət göstərir. Bu da spesefik şişlərlə mübarizədə və tibb aləmində böyük bir yenilik deməkdir.