Rusiyalı arxeoloq Ukraynanın tələbi ilə Polşada saxlanılıb

11 dekabr 2025 246 baxış

Ermitajın əməkdaşı Krımda qanunsuz qazıntılar aparmaq ittihamı ilə Polşada həbs edilib.

Polşa mediası xəbər verir ki, alim Ukrayna hakimiyyətinin tələbi ilə saxlanılıb. İddialara görə, onun rəhbərliyi altında arxeoloji qrup Kerç bölgəsində icazə olmadan iş aparıb və nəticədə, mədəni irs obyekti kimi qorunan ərazi qismən məhv edilib.

Saxlanılan şəxsin Ermitajın Qədim arxeologiya şöbəsinin müdiri, Andrey B. kimi tanınan şəxs olduğu bildirilir. Soyadı rəsmi olaraq açıqlanmasa da, onun klassik arxeologiya üzrə mütəxəssis Aleksandr Butyagin olduğu güman edilir. O, əvvəllər Krımın şərqindəki Myrmekion və Kalos Limen qədim yaşayış məskənlərini araşdıran ekspedisiyalara rəhbərlik edib.

Rus alimi Polşadan tranzit keçərkən saxlanılıb və 40 gün müddətinə həbs edilib. Ukrayna tezliklə onun ekstradisiyasını tələb etmək niyyətindədir. Ekstradisiya edilərsə və günahkar bilinərsə, alim 10 ilə qədər həbs cəzası ilə üzləşə bilər.

#Ermitaj muzeyi