Rusiyanı Özbəkistan vətəndaşlarına hörmətlə yanaşmağa çağırırıq | Özbəkistan XİN rəsmisi

Özbəkistan Xarici İşlər Nazirliyi Rusiya ərazisində ölkə vətəndaşlarına qarşı əsassız yoxlamalar, hörmətsiz və kobud rəftar halları ilə bağlı narahatlığını ifadə edib.

Bu barədə Nazirliyin mətbuat katibi Ahror Burxanov “X”dəki hesabında bildirib.

Onun sözlərinə görə, Özbəkistanın Moskvadakı səfirliyi bu məsələlərə görə Rusiya XİN-ə nota göndərib. A.Burxanov vurğulayıb ki, belə hallar ölkələrimiz arasındakı dostluq münasibətlərinə uyğun deyil və bunları qabaqlamaq üçün konkret tədbirlər görülməlidir.

“Özbəkistan Respublikası xaricdə yaşayan və müvəqqəti olan vətəndaşlarının hüquq və maraqlarının qorunmasını əsas vəzifə hesab edir. Bu məsələ ilə bağlı Özbəkistanın Moskvadakı səfirliyi də müvafiq diplomatik kanallar vasitəsilə Rusiya tərəfi ilə dialoq aparır. Özbəkistan tərəfi bütün vətəndaşlara münasibətdə beynəlxalq hüquqa və insan hüquqlarına riayət olunmasını təmin etməyə çağırır. Bununla əlaqədar biz Rusiyanın müvafiq orqanlarını Özbəkistan vətəndaşlarına hörmətlə yanaşmağa çağırırıq”, – deyə o bildirib.

Qurumun nümayəndəsi deyib ki, Özbəkistan Xarici İşlər Nazirliyi bu məsələni daimi nəzarətdə saxlayır və lazım gəldikdə əlavə tədbirlər görməyə davam edəcək.