Rusiyanın yeni reaktiv dronları: Ukrayna ordusu çarəsiz qala bilər - Baku TV

Ukrayna hazırda "Geran" pilotsuz uçuş aparatları ilə mübarizə aparmaq üçün bütöv bir vasitələr kombinasiyasından istifadə edir.

Rusiyanın Ukraynaya zərbələr endirmək üçün ən çox istifadə etdiyi PUA növü İranın "Shahed" aparatlarının analoqu olan "Geran-2" dir.

Lakin "Business Insider" nəşrinin yazdığına görə, Ukrayna artıq bir neçə aydır Rusiyanın reaktiv pilotsuz təyyarələrin istehsalını və istifadəsini əhəmiyyətli dərəcədə genişləndirəcəyini gözləyir.

Ukrayna Hava Hücumundan Müdafiə sisteminin bu cür PUA-ların kütləvi tətbiqi ilə mübarizə aparmaqda çətinlik çəkəcəyi bildirilir. Söhbət saatda 330 kilometrdən çox sürət yığmaq qabiliyyətinə malik olan "Geran-3" PUA-larından gedə bilər.

Ukrayna kəşfiyyatının məlumatına görə, daha güclü mühərrikə və qısaldılmış burun hissəsinə malik sonrakı versiya – "Geran-4" isə saatda 480 kilometrdən çox sürət yığır.

İyunun 4-də Ukrayna Silahlı Qüvvələrinin Ali Baş Komandanı Aleksandr Sırski xəbərdarlıq edib ki, Rusiya Ukraynaya zərbələr endirmək üçün əsas vasitə kimi reaktiv dronlardan istifadə etməyi planlaşdırır.