Rusiyaya gedənlər nə etməli olacaq? | 2025-ci ildən…

Rusiya ali məktəblərində təhsil almaq istəyən əcnəbi tələbələr gələn ildən rus dilindən imtahan verməli olacaqlar.

Bu barədə Rusiya Baş nazirinin müavini Dmitri Çernışenko bildirib.

Onun sözlərinə görə, bununla bağlı müvafiq əmri təhsil və elm naziri Valeri Falkov imzalayıb.

“Əmrə əsasən, gələn il aprelin 1-dən Rusiya ali məktəblərinə daxil olmaq istəyən bütün əcnəbilər üçün icbari rus dili imtahanı keçiriləcək”, – deyə Rusiya Federasiyası hökumət sədrinin müavini vurğulayıb.

O qeyd edib ki, Rusiya Prezidenti Vladimir Putin 2030-cu ilə qədər azı 500 min əcnəbi vətəndaşın ölkə universitetlərində təhsil alması barədə göstəriş verdiyi üçün bu iş sistemli şəkildə aparılır.

Rusiya Təhsil və Elm Nazirliyinin məlumatına görə, hazırda ölkənin ali məktəblərində 380 min əcnəbi tələbə təhsil alır.