Şəffaflıq İnstitutunun taleyi ilə bağlı qərar qalmaqala səbəb oldu

Meksikanın Qanunverici Assambleyasında Şəffaflıq, Məlumatlara Çıxış və Şəxsi Məlumatların Mühafizəsi İnstitutunun gələcəyi ilə bağlı keçirilən iclas qalmaqalla yadda qalıb.

Belə ki, müzakirələr zamanı deputatlar arasında kəskin qarşıdurma yaranıb və bu, fiziki toqquşmaya çevrilib.

Qanun layihəsi institutun ləğvini və ya səlahiyyətlərinin məhdudlaşdırılmasını nəzərdə tutur. Müxalifət deputatları bu addımın dövlət qurumlarının fəaliyyətinə ictimai nəzarəti zəiflədəcəyini, vətəndaşların məlumat almaq hüququna ciddi zərbə vuracağını bildiriblər. Hakim koalisiya isə islahatların zəruriliyini və büdcə xərclərinin optimallaşdırılmalı olduğunu vurğulayıb.

Gərgin müzakirələr fonunda deputatlar bir-birini itələyib, zalda xaos yaranıb. Hadisəyə təhlükəsizlik əməkdaşları müdaxilə edib, iclas müvəqqəti olaraq dayandırılıb.

Baş verən insident Meksikada siyasi gərginliyin artdığını göstərir. Qanun layihəsinin taleyi ilə bağlı müzakirələrin yaxın günlərdə davam etdirilməsi gözlənilir.