SEPAH xəbərdarlıq etdi: Atəşkəsin pozulması danışıqları dayandıra bilər - Baku TV

İslam İnqilabı Keşikçiləri Korpusu Amerikanın son zərbələrinə cavab olaraq ABŞ-nin Küveyt və Bəhreyndəki hərbi obyektlərinə raket və pilotsuz uçuş aparatları ilə zərbələr endirdiyini bəyan edib.

SEPAH-ın bu barədə bəyanatını IRIB yayıb.

Bəyanatda qeyd olunub ki, bazar günü gecə saatlarında Korpusun hərbi dəniz və hərbi hava qüvvələri ballistik raketlər və dronlardan istifadə edərək ABŞ hərbi infrastrukturunun səkkiz obyektinə, Küveyddəki “Əli əs-Salim” bazasındakı və Bəhreynin Salman limanındakı 5-ci donanmasının bazasına hücum edib.

Bəyanatda həmçinin qısa müddət əvvəl ABŞ-nin İslam Respublikasının beş sahil postuna zərbələr endirdiyi xatırladılıb.

“İslamabad memorandumuna əsasən, Hörmüz boğazında gediş-gəlişə nəzarət qaydaları İslam Respublikasına məxsusdur və bundan sonra da qayda pozan gəmilərə qarşı əvvəlkindən daha sərt tədbirlər görüləcək”, – deyə bəyanatda qeyd olunub.

Atəşkəsin pozulmasının İslamabad memorandumunun birinci bəndinə zidd olduğu vurğulanan bəyanatda bu halların danışıqlar prosesinin dayandırılmasına səbəb olacağı bildirilib.

Daha əvvəl ABŞ Mərkəzi Komandanlığı İrandakı hərbi hədəflərə əlavə zərbələr endirildiyini açıqlayıb.

Komandanlığın məlumatına görə, zərbələr İranın kommersiya gəmisinə növbəti hücumuna cavab olaraq həyata keçirilib.

İddia olunur ki, iyunun 27-si səhər saatlarında İranın kamikadze pilotsuz uçuş aparatı Hörmüz boğazı yaxınlığında Panama bayrağı altında üzən və iki milyondan çox barel neft daşıyan “Kiku” tankerini vurub.

Bundan sonra ABŞ hərbi aviasiyası İranın hərbi kəşfiyyat obyektlərinə, rabitə sistemlərinə, Hava Hücumundan Müdafiə mövqelərinə, pilotsuz uçuş aparatlarının saxlanıldığı anbarlara və dəniz minalarının yerləşdirilməsi vasitələrinə zərbələr endirib.

Komandanlıq əlavə edib ki, Hörmüz boğazından kommersiya gəmilərinin hərəkəti davam edir və ABŞ qüvvələri zərurət yaranacağı təqdirdə əlavə tədbirlər görməyə hazırdır.