Serbiyada dəhşətli tramvay qəzası: 12 nəfər...

Serbiyanın paytaxtı Belqradın mərkəzindəki Dorçol məhəlləsində ağır yol-nəqliyyat hadisəsi baş verib.

Hərəkətdə olan tramvay relsdən çıxaraq binaya çırpılıb. Zərbənin gücündən tramvayın kabinəsi tamamilə əzilib, binanın fasadının bəzi hissələri isə səkiyə tökülüb.

Son məlumatlara görə, qəza nəticəsində tramvaydakı sərnişinlərdən 10 nəfəri müxtəlif dərəcəli bədən xəsarətləri alıb. Hadisə zamanı binanın daxilində olan iki qadının isə yüngül xəsarət aldığı bildirilir.

Əraziyə dərhal polis və tibbi briqadalar cəlb olunub. Yaralılara yardım göstərilib. Polis əməkdaşları ərazini nəzarətə götürüb. İlkin araşdırmalar davam edir.

Qəzanın dəqiq səbəbinin texniki nasazlıq, relslərdəki problem, yoxsa insan faktoru olduğunu müəyyənləşdirmək üçün təhqiqat işlərinə başlanılıb.