Şimali Kiprdə dəhşət: azərbaycanlıların da olduğu gəmi niyə batdı? - Baku TV

Şimali Kipr Türk Respublikasının sahillərində 267 sərnişin daşıyan bərə batıb. Ekipaj üzvləri ilə birlikdə gəmidə ümumilikdə 279 nəfərin olduğu bildirilir.

Türkiyə mediasının məlumatına görə, hadisə nəticəsində 241 nəfər xilas edilib, 8 nəfər həyatını itirib, 18 nəfərin axtarışları isə davam etdirilir.

Faciə ilə əlaqədar Şimali Kipr Türk Respublikasında üç günlük matəm elan olunub.

Batan gəmidə iki Azərbaycan vətəndaşının da olduğu bildirilir. Onların sərnişin deyil, gəminin texniki heyətinin üzvləri olduğu və xilas edildikləri qeyd olunur.

Azərbaycan-Kipr Dostluq Cəmiyyətinin rəhbəri Orxan Həsənoğlunun sözlərinə görə, hadisə ilə bağlı gəminin kapitanı və ekipajın yeddi üzvü məhkəməyə çıxarılıb. Məhkəmə qəza ilə bağlı məsuliyyətə cəlb olunması vacib hesab edilən 16 nəfərin növbəti iclasa gətirilməsini tələb edib.

O bildirib ki, qəzanın səbəbləri ilə bağlı yekun rəy hələ açıqlanmayıb. İlkin məlumatlara əsasən, gəmidə ciddi texniki nasazlıqlar olub.

Qeyd edilib ki, saat 10:00-da yola çıxmalı olan gəmi saat 12:00-dək gecikib. Gecikmə hava şəraiti və texniki problemlərlə əlaqəli olub.

Vurğulanıb ki, hadisənin dəqiq səbəbləri yaradılmış komissiyanın araşdırmasından sonra məlum olacaq.