Şimali Koreya nəhəng raketlə bu ölkəni hədəf aldı? - Gərginlik pik həddə

Şimali Koreyanın 31 oktyabr gecə saatlarında atdığı ballistik raketin qitələrarası raket olduğu güman edilir.

Bu barədə Koreya Respublikası Silahlı Qüvvələrinin Baş Qərargah Rəisləri Komitəsinə istinadən məlumat yayılıb.

“Şimali Koreyanın buraxdığı raket dik trayektoriya ilə buraxılmış qitələrarası ballistik raket kimi görünür”, – deyə Komitənin bəyanatında deyilir.

Cənubi Koreya Ordusu həmçinin bildirib ki, buraxılış yerli vaxtla saat 07:10-da Pxenyan ərazisindən Yapon dənizinə doğru həyata keçirilib.

Koreya Respublikasının ordu generalı Ahn Chan-Myeongun sözlərinə görə, sözügedən raket buraxılışı BMT Təhlükəsizlik Şurasının ballistik raket texnologiyası ilə bağlı fəaliyyəti, eləcə də elmi və texnoloji əməkdaşlığı qadağan edən qətnamələri açıq şəkildə pozur:

“Ordumuz Kim Çen In rejiminin qanunsuz və ehtiyatsız təxribatlarını pisləyir və KXDR-i bu hərəkətlərə dərhal son qoymağa çağırır. Koreya yarımadasında və beynəlxalq ictimaiyyətdə sülh və sabitliyin təhdid olunması, o cümlədən zibil balonlarının davamlı olaraq ərazimizdə görünməsi yolverilməzdir.

Hərbçilərimizin dəfələrlə xəbərdarlıq etmələrinə baxmayaraq, Şimali Koreya qanunsuz təxribatlarını davam etdirir. Bir daha təkrar edirik ki, baş verənlərə görə Şimali Koreya məsuliyyət daşıyacaq”.

Mövcud durumla bağlı Cənubi Koreya Müdafiə Nazirliyinin sözçüsü brifinqdə bildirib ki, Şimali Koreya ABŞ-ni vura bilmək üçün ballistik raketləri havaya qaldırıb. Bu sınaq hərbi əməliyyatı olsa da, real hədəflər bəllidir.

“Şimali Koreya oktyabrın 30-dan 31-nə keçən gecə ABŞ-ni vurmaq üçün nəzərdə tutulan yeni uzaqmənzilli raketi sınaqdan keçirib. Şimali Koreya qoşunlarının rusiyalı hərbçilərin geyimində Ukraynaya doğru hərəkət etdiyi və müharibəyə qoşulacağı ehtimal olunur”, – deyə Cənubi Koreya Müdafiə Nazirliyinin sözçüsü Li Son Cun bildirib.