Şimali Koreya və Yaponiya arasında gərginlik artır

Yaponiya hökuməti Şimali Koreya hakimiyyətini kəşfiyyat peyki buraxmaqdan çəkinməyə çağırıb.

Bunu Yaponiya Nazirlər Kabinetinin baş katibi Hirokadzu Matsuno bəyan edib. “Yaponiya hökuməti hesab edir ki, raketin buraxılması BMT Təhlükəsizlik Şurasının qətnamələrinin pozulması və Yaponiyanın təhlükəsizliyinə qarşı böyük təxribat olacaq”, – deyə H.Matsuno qeyd edib.

Yaponiya Müdafiə Nazirliyi isə bildirib ki, Şimali Koreyanın ballistik raketinin və ya onun fraqmentlərinin Yaponiya ərazisinə düşməsi təhlükəsi yaranarsa, Tokio onları məhv etmək üçün bütün lazımi tədbirləri görəcək.

Qeyd edək ki, Şimali Koreya iyunun 11-dək ilk kəşfiyyat peykini orbitə çıxarmaq niyyətindədir.

Öz növbəsində Yaponiyanın Baş naziri Fumio Kişida vurğulayıb ki, Şimali Koreya lideri Kim Çen Inla görüşməyə hazırdır və bu məsələdə irəliləyiş gözləyir. Kişida həmçinin xatırladıb ki, oğurlanmış Yaponiya vətəndaşları ilə bağlı məsələni həll etmək üçün Kim Çen Inla ilkin şərt olmadan şəxsən görüşmək istəyi barədə dəfələrlə danışıb.

KXDR xarici işlər nazirinin müavini Pak San Qil isə qeyd edib ki, Tokio “keçmişi xatırlatmağı” dayandırsa və oğurlanmış yapon vətəndaşları mövzusunun müzakirəsini danışıqlar üçün şərt kimi irəli sürməsə, Pxenyan Tokio ilə sammit keçirməyə hazırdır.