Su altında yerləşən qitə necə yoxa çıxdı və necə tapıldı?

Dünyadakı qitələri sadalamağınız istənilsə, çox güman ki, Asiya, Avropa, Afrika, Amerika, Antarktida və Okeaniya adlarını çəkərsiniz.

Bəs heç Zelandiya adlı itmiş qitədən xəbəriniz varmı?

Zelandiya uzun illərdir elmi müzakirə mövzusu olub, lakin varlığı yalnız 8 il əvvəl ‒ 2017-ci ildə rəsmən təsdiqlənib. Təxminən 4300 kilometr uzunluğunda və 4,9 milyon kvadratkilometr sahəsi olan bu qitənin 95 faizi su altında yerləşir.

Zelandiya təxminən 500 milyon il əvvəl Qondvana adlı superqitənin bir hissəsi olub. Lakin alimlərin bu günə qədər də tam izah edə bilmədikləri səbəblərlə qitə parçalanaraq uzaqlaşıb və böyük hissəsi okean sularının altında qalıb.

Amerika Geoloji Cəmiyyətinin 2017-ci ildə dərc etdiyi hesabatda bildirilib ki, Zelandiya yeddinci ən böyük geoloji qitə olmaqla yanaşı, həm də ən gənc, ən nazik və sular altında ən çox qalan qitədir.

Müxtəlif illərdə aparılan araşdırmalar zamanı onun geoloji strukturu xəritələndirilib. Bu tədqiqatlar sayəsində Zelandiya dünya üzərində sualtı sərhədləri də daxil olmaqla tam xəritələndirilmiş ilk qitə statusunu qazanıb. Buna baxmayaraq, tədqiqatçılar hələ kəşf olunmamış bir çox detalın olduğunu və bu qitənin formalaşmasında hansı geoloji hadisələrin nə zaman və necə baş verdiyinin öyrənilməsinin vacib olduğunu bildirirlər.