Su növbəsində öldürüldülər | Qəzzada vəziyyət niyə daha da pisləşir?

Qəzza zolağında vəziyyət getdikcə pisləşir.

Humanitar böhranın fonunda, Qəzzanın Səhiyyə Nazirliyi son 24 saat ərzində aclıq və qida çatışmazlığı səbəbindən üçü azyaşlı olmaqla, 13 ölümün qeydə alındığını açıqlayıb.

Beləliklə, aclıqdan ölənlərin ümumi sayı 361 nəfərə çatıb. Onlardan 130 nəfəri azyaşlıdır.

İsrailin Qəzzada həyata keçirdiyi hücumlarda isə azı 73 nəfər fələstinli həyatını itirib. Əlavə olaraq, Qəzzanın cənubundakı əl-Məvasi bölgəsi də atəşə tutulub. Orada 7 nəfər, o cümlədən su üçün növbəyə duran 5 azyaşlı həlak olub.

Bütün bunların fonunda, Qətər Xarici İşlər Nazirliyinin sözçüsü Məcid əl-Ənsari İsrailin HƏMAS-ın Qəzza ilə bağlı son atəşkəs təklifinə hələ cavab vermədiyini açıqlayıb. Qətər rəsmisi Netanyahu hökumətini müharibəni dayandırmaq üçün danışıqlara getməyə çağırıb.

"İsrailin hələlik heç bir cavabı yoxdur" deyən Ənsari vasitəçilər və ABŞ ilə davamlı təmasların olduğunu, lakin bu günə qədər ciddi bir irəliləyişin qeydə alınmadığını söyləyib.

Son olaraq, o, İsrailin Qəzzanı işğal etmək planının regionda olan israilli əsirlər də daxil olmaqla, hər kəs üçün təhlükə yaratdığını vurğulayıb.

Onun sözlərinə görə, Təl-Əviv istəmədiyi halda sülh prosesini gözləməyin mənası yoxdur.