Suriya və İsrail arasındakı gərginlik pik həddə | “Buna icazə verməyəcəyik”

Suriyada druz azlığından olan bir tacirin qaçırılması ölkənin cənubunda druzlarla bədəvi qrupları arasında gərginliyi artırıb.

İyulun 13-də başlayan hadisələr nəticəsində ölümcül qarşıdurmalar baş verib. İsrailin iyulun 15-də hərbi müdaxilə elan etməsi vəziyyəti daha da gərginləşdirib.

İsrail druzları qorumaq məqsədilə Əs-Süveydada hökumətyönümlü qüvvələrə qarşı əməliyyat həyata keçirib.

Baş nazir Benyamin Netanyahu Suriyanın cənubunda druzlara hücum edən hökumət qüvvələrini məhv edəcəyini bildirərək onların geri çəkilməsini tələb edib və Dəməşqə kütləvi hava zərbələri endirib. Əs-Süveyda əyalətində baş verən hərbi toqquşmalar nəticəsində ölənlərin sayı 600-ə çatıb.

“Ortaya aydın bir siyasət qoymuşuq. İlk növbədə Dəməşqin cənubunda, Qolan təpələrindən Druz dağları ərazisinə qədər bölgə silahsızlaşdırılmalıdır. İkincisi, Druz qardaşlarımızın müdafiəsidir. Bu hər iki prinsip Dəməşqdəki rejim tərəfindən dağıdıldı. Onlar Dəməşqin cənubuna qoşun göndərdilər. Biz bunu heç bir şəkildə qəbul edə bilmərik.

Buna görə də İsrail Ordusuna tapşırıq vermişəm ki, lazımi tədbirlər görsünlər. Biz Suriya Ordusunun Dəməşqin cənubundakı bölgəyə girməsinə icazə verməyəcəyik”, – deyə İsrailin Baş naziri Benyamin Netanyahu bildirib.