Təhlükəsizlik və sabitliyə qarşı yaranan təhdid

Səudiyyə Ərəbistanının rəhbərlik etdiyi birləşmiş koalisiya Cənub Keçid Şurasının qüvvələri tərəfindən Əl-Mükəlla limanının ələ keçirilməsi fonunda Yəmənin Hadramaut vilayətində məhdud hərbi əməliyyatın başlanıldığını elan edib və dekabrın 30-da səhərin erkən saatlarda Yəmənin Hadramaut əyalətindəki liman şəhəri Əl-Mükəllaya zərbələr endirib.

Hərbçilərin bəyanatında qeyd olunub ki, təhlükəsizlik və sabitliyə yaranan təhdid nəzərə alınaraq koalisiyanın Hərbi Hava Qüvvələri Əl-Mükəlla limanında gəmilərdən boşaldılan silah və döyüş maşınlarına qarşı məhdud əməliyyat keçirib.

Səudiyyə Ərəbistanı dövlət mediasının məlumatına görə, koalisiya Əl-Mükəlla limanına edilən hücumda heç bir itki və ya əlavə ziyanın olmadığını bildirib.

Qeyd edək ki, Yəmən və Səudiyyə Ərəbistanı arasında baş verənlər əsasən Yəmən müharibəsi ilə bağlıdır. 2014-2015-ci illərdə Yəməndə husilərin paytaxt Səna da daxil olmaqla böyük əraziləri ələ keçirməsi ilə Səudiyyə Ərəbistanı bunu öz təhlükəsizliyinə təhdid sayıb, 2015-ci ildə koalisiya ilə birlikdə Yəmənə müdaxilə edib.

Beləliklə, Səudiyyə tərəfi Yəmənin beynəlxalq səviyyədə tanınmış hökumətini, husilər isə faktiki olaraq ölkənin böyük hissəsini nəzarətdə saxlayır. Döyüşlər azalsa, atəşkəs və danışıqlar mərhələsi ön plana çıxsa da, tam sülh razılaşması hələ əldə olunmayıb və ölkə faktiki olaraq bölünmüş vəziyyətdədir.