“Telegram”ın qurucusundan qalmaqal yaradacaq açıqlamalar

"Telegram"ın qurucusu Pavel Durov bir qədər təxribatçı, bir qədər də anarxist qəbul ediləcək fikirlər irəli sürüb və müasir dövrün əsas fırıldaqlarını açıqlayıb.

O bu barədə "X" sosial media hesabında yazıb. Pavel siyahıya evlilik, dəbdəbə, vergilər və hətta reallığın özünü də daxil edib.

"Əczaçılıq. Qida sənayesi. Bank sistemi. Evlilik. Vergitutma. Dəbdəbə. Müstəqil media. Qeyri-hökumət təşkilatları. Şəhərlər. Ölkələr. Reallığın özü", – deyə Pavel paylaşımında yazıb.

Milyarder xüsusilə evlilik institutuna diqqət ayırıb. O bunu ömürlük eksklüziv müqavilə kimi xarakterizə edib və bildirib ki, bu müqavilənin pozulması çox baha başa gəlir.

Qeyd edək ki, ötən il Durov 12 ölkədə sperma donorluğu nəticəsində dünyaya gələn 100-dən çox bioloji övladının, həmçinin üç fərqli qadından altı rəsmi uşağının olduğunu açıqlamışdı. İş adamı bu yaxınlarda vəsiyyətini açıqlayaraq bildirib ki, 106 uşağın hamısı miras hüququnda bərabər olacaq. 2024-cü ilə olan məlumata görə, Durovun sərvəti 15,5 milyard dollar qiymətləndirilir.