Tramp görüş üçün niyə neft ölkəsini seçdi? | Maksim Şevçenkodan maraqlı açıqlama

Böyük siyasət dünyasında hər şey simvolizmə köklənib. Səudiyyə Ərəbistanı dünyanın ən böyük neft istehsalçısı və satıcısıdır. Ukrayna ilə bağlı sövdələşmənin əsas məzmunu neft olacaq. Rusiyaya açıq şəkildə neft bazarına qayıtmağa və dünyanın ən zəngin neft şirkəti “Saudi Aramko”nun elan edilmiş özəlləşdirilməsində iştirak etməyə icazə verilə bilər.

Bunu rusiyalı jurnalist, şərhçi Maksim Şevçenko deyib.

“Əməkdaşlıq təcrübəsi var. “Lukoyl” “Saudi Aramko” ilə birgə müəssisə yaradıb və bu, Donald Trampın edə biləcəyi yeganə şeydir. Bu onun əlindədir. O, qlobal maliyyə sisteminə nəzarət etmir və bank sektorunda sanksiyaları ləğv etməyə məcbur edə bilməz.

Eyni zamanda Donald Tramp həm Ukrayna, həm də Fələstin məsələsində “qərar verici” rolunda çıxış etmək üçün fələstinlilərin deportasiyasına Səudiyyə Ərəbistanının razılığını almağa çalışacaq.

Məsələn, Məhəmməd bin Salmana “Vision 2030” planını qismən həyata keçirməyə və dünyanın ən böyük neft şirkəti olan “Saudi Aramko”da qeyd olunan özəlləşdirməni həyata keçirməyə icazə verəcək. Donald Trampın əsas problemi odur ki, bütün razılaşmaların 2028-ci ildən sonra davam edəcəyinə zəmanət verə bilməz.

Bəs onun elan etdiyi “Amerikanın qızıl dövrü” baş tutmasa? İndiyədək Donald Trampın beynəlxalq arenada yeganə uğuru Vladimir Putinin onunla telefonla danışmağa razı olmasıdır”, – o bildirib.

Qeyd edək ki, Donald Tramp rusiyalı həmkarı Vladimir Putinlə görüşünün Səudiyyə Ərəbistanında baş tuta biləcəyini deyib.