Tramp Harrisi özündən çıxardı | Rekord qıran debatda kim kimi üstələdi?

ABŞ-də prezidentliyə namizədlər Donald Tramp və Kamala Harrisin seçkiqabağı debatlarının birinci mərhələsi baş tutub.

Sözügedən debat dünyada izlənmə rekordunu qırıb. Amma buna baxmayaraq, tərəflər arqumentləri ilə bir-birini “nokauta” sala bilməyib. Trampın ittihamları, Harrisin göz süzdürmələri sözün əsl mənasında izləyiciləri ekran qarşısına kilitləyib.

Donald Tramp prezident seçilərsə, dünyada sabitliyə, müharibəsiz həyata nail olmaq üçün can atacağını deyib.

“Biz çətin vəziyyətdə olan dövlətik və bu, üç il yarım əvvəl baş verib. Siz Üçüncü Dünya müharibəsi astanasındasınız. Amma bu, heç vecinizə də deyil. Seçdiyiniz hazırkı prezident Bayden nə edir? Ölkəni viran qoyub. Özü isə kruizlərdə dincəlir”, – o bildirib.

Trampın aqressiv və qınaq dolu çıxışı qarşılığında Kamala Harris də səssiz qalmayıb.

“Çox gülüş doğuran məqamdır deyilmi? Dəfələrlə hakim qarşısına çıxarılan, seksual xarakterli hərəkətlərə görə ittiham olunan, dövlətə xəyanətdə şübhəli bilinən, seçkilərə müdaxilə cəhdinə görə cinayətkar qismində saxlanılan adam kimisə istirahətə gedib deyə qınaya bilməz. “Rusiya-Ukrayna müharibəsini ram edəcəyəm” demək sizə inandırıcı gəlirmi? Cənab Tramp, Putin səni nahara yeyər”, – Harris qeyd edib.