Uzunömürlü günəş panelləri | Batareyalar neçə il fasiləsiz işləyə bilir?

Finlandiyanın Abo Akademi Universiteti və Çinin Nanotexnologiya və Nanobionika İnstitutunun tədqiqatçıları nəinki yüksək effektivlik nümayiş etdirən, həm də 16 il fəaliyyət göstərən günəş panelləri yaradıblar.

Alimlərin fikrincə, təcrübələr zamanı sahəsi bir kvadrat santimetr olan tərs çevrilmiş struktura malik üzvi günəş panelləri 18%-dən çox rekord səmərəliliyə nail olub.

Daha təsiredici bir xüsusiyyət onların istifadə müddətidir: batareyalar ağ işıq altında 24 700 saat fasiləsiz işləyə bilir ki, bu da demək olar ki, 16 illik istifadəyə bərabərdir.

İndiyədək tədqiqatçılar yüksək effektivliyə baxmayaraq, üzvi günəş panellərində materialların sürətlə deqradasiyası problemi ilə üzləşiblər. Finlandiya və Çin alimlərinin kəşfi bu problemi həll etməyə kömək edib, uzunömürlü günəş panellərinin kütləvi istehsalına yol açıb. Komanda tərs çevrilmiş struktura malik üzvi günəş batareyalarının işində əsas problemi müəyyən edib. Belə ki, batareyaların alt təmas təbəqəsi, tez-tez sink kimi metal oksidlərdən hazırlanır, dar rekombinasiya bölgəsi yaradır.

Günəş hüceyrələrində rekombinasiya işıqla aktivləşdirilən elektronun ilkin vəziyyətinə qayıtma prosesidir. Rekombinasiya foto cərəyanının itirilməsi ilə nəticələnir, hüceyrənin ümumi effektivliyini azaldır. Bu problemi həll etmək üçün tədqiqatçılar alt kontakta nazik bir həlledici ilə işlənmiş silikon nitrat qatını tətbiq ediblər. Bu passivasiya təbəqəsi rekombinasiya bölgəsini aradan qaldıraraq cihazların səmərəliliyini və sabitliyini xeyli artırıb.

Tədqiqatçıların fikrincə, bu nailiyyət təmiz enerjiyə keçid istiqamətində mühüm addım ola bilər. Yeni panellər mədən ehtiyatlarından asılılığı azaldacaq və ucqar bölgələri elektrik enerjisi ilə təmin edəcək.