Tramp Rusiya ilə bağlı qərar verəcək?

Ukrayna Ordusu sutka ərzində Rusiyanın 960 hərbçisini məhv edib. Bundan başqa, 13 artilleriya sistemi sıradan çıxarılıb.

Ukrayna Silahlı Qüvvələrinin Baş Qərargahının yaydığı məlumata görə, yaylım və hava hücumundan müdafiə sistemləri də zərərsizləşdirilib. Rusiya Ordusuna aid 294 pilotsuz uçuş aparatı vurulub.

Rusiya Ordusu isə Xarkovu raket zərbələrinə məruz qoyub. 17 yaşlı qız həlak olub, xəsarətalanlar var.

Dnepr dron hücumuna məruz qalıb. Dəmir yolu vağzalı atəşə tutulub, partlayış baş verib.

Ümumilikdə Rusiyanın əsas hədəfi Ukrayna ərazisindəki 142 obyekt olub. Rusiya Müdafiə Nazirliyinin məlumatına görə, Kupyansk və Pokrovsk istiqamətində Ukrayna Ordusunun hücumlarının qarşısı alınıb.

Bununla yanaşı, Ukrayna Ordusuna aid 31 dron zərərsizləşdirilib. PUA-lar Voronej, Tambov, Rostov, Yaroslavl, Smolensk, Bryansk, Kursk və Orlovda vurulub.

Bu arada, ABŞ Prezidenti Donald Tramp Rusiyaya qarşı sanksiyalar tətbiq edə bilər. Amma Ağ Ev rəhbərinin bir şərti var. Belə ki, Tramp Rusiyaya qarşı məhdudiyyətlər mövzusunda son söz və qərar səlahiyyətini özündə saxlamaq istəyir.