Trampın çıxışlarının redaktəsi Böyük Britaniyanın telekanalına baha başa gəldi

Böyük Britaniyaya məxsus BBC telekanalının baş direktoru Tim Deyvi və xəbərlər departamentinin rəhbəri Deborah Turness işdən ayrılmaq barədə ərizə yazıblar. İstefalara səbəb onların ABŞ Prezidenti Donald Trampın çıxışlarını yanlış redaktə etməkdə günahlandırılmasıdır.

Bu informasiya səs-küyə səbəb olub. Çünki istefaların arxasında ABŞ-nin əlinin olması barədə ehtimallar yayılıb. Böyük Britaniya hökuməti tərəfindən maliyyələşdirilən telekanal media standartlarına uyğun olmayan fəaliyyət göstərdiyinə görə, İsrail-HƏMAS müharibəsi, transgender məsələləri və D.Trampın çıxışı ilə bağlı xəbərlərin işıqlandırılmasında çatışmazlıqların olması səbəbindən ciddi tənqidlərlə üz-üzə qalıb.

Bu məsələlərlə bağlı daxili hesabatının “The Daily Telegraph” nəşrinə sızması nəticəsində isə hər şey daha da alovlanıb. Nəşrdə BBC-nin sızdırılmış daxili memorandumunun təfərrüatları dərc olunub. Onlar D.Trampın 2021-ci il çıxışlarını elə təqdim ediblər ki, guya ABŞ-nin hazırkı Prezidenti o vaxt Kapitoli iğtişaşlarını təşviq edirdi.

Qeyd edək ki, 2020-ci ildən bəri Böyük Britaniya Yayım Korporasiyasına Tim Deyvi rəhbərlik edir. O, qurumu müdafiə edərək BBC jurnalistikasının dünyada qızıl standart kimi qəbul edildiyi iddiasındadır. Lakin T.Deyvi səhvlərə yol verildiyini və son məsuliyyəti rəhbər şəxs kimi öz üzərinə götürməli olduğunu vurğulayıb.

Tənqid atəşinə tutulan növbəti şəxs isə kanalın baş redaktoru Deborah Turness olub. O, istefasından öncə işçilərə mesaj ünvanlayıb:

“BBC xəbərlərinin qərəzli olması ilə bağlı son iddiaların tamamilə səhv olduğunu aydın şəkildə sizin nəzərinizə çatdırmaq istəyirəm”.