Trampın imzaladığı sənədlə ABŞ-də nə dəyişəcək?

ABŞ Prezidenti Donald Tramp federal hökumətin fəaliyyətinin maliyyələşdirilməsinin 2026-cı il yanvarın 30-dək davam etdirilməsini nəzərdə tutan qanunu imzalayıb.

Bununla da ABŞ hökumətinin rekord müddətli fəaliyyətinin dayandırılması 43-cü gündə başa çatıb.

Trampın sözlərinə görə, onun sənədi imzalaması ilə federal hökumət normal işinə qayıdır.

Bununla yanaşı, ABŞ lideri bir daha “shutdown”u təhrik etməkdə demokratları günahlandıraraq onların ucbatından ABŞ-də 20 min aviareysin ləğv edildiyini və ya gecikdirildiyini, bir milyondan çox dövlət qulluqçusunun maaşsız qaldığını, çoxsaylı aztəminatlı amerikalıların ərzaq yardımı proqramı üzrə ödənişlər almadığını bəyan edib. Bu sənədlə yanvarın sonuna qədər hökumətin işi üçün maliyyə ayrılması təsdiqlənib.

Həmçinin 2026-cı maliyyə ili üçün ABŞ Kənd Təsərrüfatı Nazirliyi, Veteranlarla İş Departamentinin və ABŞ-nin hərbi məqsədli tikinti proqramlarının icrasına vəsait ayrılacaq.