“Trampın məqsədlərinin böyük hissəsinə nail olunub” | Albaniz

Avstraliya hökuməti Yaxın Şərq münaqişəsinin yaratdığı qlobal iqtisadi sarsıntıların təsirləri ilə üzləşən yerli müəssisələrə 4 milyard dollardan çox dəstək ayırmaq qərarına gəlib.

Bu barədə Baş nazir Entoni Albaniz bildirib.

Onun sözlərinə görə, 4,1 milyard dollarlıq vəsait sürətləndirilmiş rejimdə veriləcək və yerli istehsalı, şirkətləri dəstəkləmək, onların təchizat zəncirlərini bazar şoklarından qorumaq üçün nəzərdə tutulub:

“Bu gün elan edirəm ki, iqtisadi dayanıqlılıq proqramımız çərçivəsində istehsal və yanacaq sahəsində fəaliyyət göstərən bizneslər üçün bu münaqişənin iqtisadi təsirləri ilə mübarizə aparmaq məqsədilə 1 milyard Avstraliya dolları məbləğində faizsiz kreditlər ayrılacaq. Hökumətimiz onların, eləcə də bu təchizat zəncirlərindən asılı olan fermerlərin və istehsalçıların bu çətin dövrü keçə bilməsi üçün kredit imkanlarını genişləndirəcək. Heç bir hökumət bu qlobal böhranın yaradacağı təzyiqləri tamamilə aradan qaldıracağına söz verə bilməz. Amma biz onun ən ağır təsirlərinə qarşı bir bufer ola bilərik”.

Albaniz vurğulayıb ki, bu tədbirlər dövlətin nəqliyyat infrastrukturunun sabit işləməsini təmin edəcək və əsas istehsal proseslərini dəstəkləyəcək.

Bundan başqa, Baş nazir Yaxın Şərq regionunda cərəyan edən müharibə ilə bağlı da fikirlər səsləndirib.

“Mən mövqeyimi açıq şəkildə bildirmişəm: biz gərginliyin azaldılmasını istəyirik. Çıxışımda da qeyd etdiyim kimi, Prezident Trampın İrana qarşı əməliyyata başlayarkən irəli sürdüyü məqsədlərin əksəriyyətinə nail olunub. İndi biz gərginliyin azaldılmasını istəyirik. Həmçinin bu vəziyyətin dünya üzrə yaratdığı iqtisadi təsirlərin də nəzərə alınmasını vacib hesab edirik”, – deyə o bildirib.