Trampın Polşa ilə bağlı qərarı qeyri-müəyyənlik yaradıb?

Çexiya Prezidenti Petr Pavel ABŞ rəhbərliyinin NATO daxilində qeyri-müəyyənliyə səbəb olan gözlənilməz hərəkətlərindən narahatdır.

Bu barədə Çexiya Xəbər Agentliyi məlumat yayıb.

"Məni hazırda NATO daxilində gördüyümüz qeyri-müəyyənlik və gözlənilməzlik narahat edir", – deyə agentlik Çexiya liderinin ABŞ Prezidenti Donald Trampın Polşaya 5000 hərbçi göndərmək qərarına cavab olaraq dediyi sözləri sitat gətirib.

Onun sözlərinə görə, bu qərar Ağ Ev tərəfindən Şimali Atlantika Alyansının digər üzv dövlətləri ilə əvvəlcədən əlaqələndirilmədən verilib.

"Müttəfiqlərimiz əvvəllər bizə hərbi qulluqçularının sayında və yerləşdirilməsində dəyişiklik barədə məlumat verirdilər", – deyə Pavel qeyd edib.

O əlavə edib ki, hətta NATO-nun Avropadakı qüvvələrinin baş komandanının da ABŞ qoşunlarının Polşaya hərəkəti barədə heç bir məlumatı yoxdur.

Pavel NATO üzv dövlətlərinin gələcəkdə bu cür qərarların daha dəqiq əlaqələndirilməsi barədə razılığa gələ biləcəyinə əminliyini ifadə edib.

Xatırladaq ki, təxminən 3 həftə əvvəl ABŞ-nin Almaniyada yerləşən bölmələrinin heyətini 5000 hərbçi azaltmağı planlaşdırdığı məlum olub.