Türkəsilli deputat Ukraynanın yeni müdafiə naziri ola bilər

Ukrayna Prezidenti Volodimir Zelenski müdafiə naziri Oleksiy Reznikovu işdən azad etmək qərarına gəldiyini və onun yerinə Dövlət Əmlak Fondunun rəhbəri Rüstəm Umerovun keçməli olduğunu bildirib.

Bu barədə dövlət başçısı videomüraciətində bildirib. Onun sözlərinə görə, kadr dəyişikliyi barədə təklif bu həftə parlamentə göndəriləcək:

“Oleksiy Reznikov bu 550 gündə genişmiqyaslı müharibədən keçdi. Hesab edirəm ki, nazirliyin həm ordu ilə, həm də bütövlükdə cəmiyyətlə yeni yanaşmalara və digər qarşılıqlı fəaliyyət formatlarına ehtiyacı var. İndi nazirliyə Rüstəm Umerov başçılıq etməlidir. Ukrayna Ali Radası bu adamı yaxşı tanıyır və cənab Umerovun əlavə təqdimata ehtiyacı yoxdur. Mən parlamentin bu namizədliyi dəstəkləyəcəyini gözləyirəm”.

Qeyd edək ki, Oleksiy Reznikovu əvəz edəcək 41 yaşlı Rüstəm Ənvər oğlu Umerov 2019-cu ildən Ukrayna Ali Radasının deputatıdır. Əslən Krımın Aluşta şəhərindən olan Umerov Özbəkistanın Səmərqənd vilayətində dünyaya gəlib. Rüstəm Umerov milliyətcə Krım tatarıdır və müsəlmandır.