Türkiyə PKK-nın tərk-silahına necə nail oldu?

“Terrorsuz Türkiyə” qurulur. Abdullah Öcalanın müraciətindən sonra PKK terror təşkilatının üzvləri tərk-silah olunmağa başlayıb.

İraqdakı bəzi PKK üzvləri silahları yandırıblar. Bununla bağlı görüntülər yayılıb. Türkiyədəki PKK-çıların da silahları təhvil verəcəyi gözlənilir.

Qeyd edək ki, PKK 1978-ci ildə qurulub. Qruplaşma bəzi xarici qüvvələrin dəstəyi ilə yaradılıb. Məqsəd Türkiyəyə qarşı təzyiq mexanizmlərinin güclədirilməsi idi. Yəni Ankaraya sözünü yeridə bilməyənlər terrorla hədələyirdilər.

1999-cu ildə PKK lideri Abdullah Öcalanın həbsi terror təşkilatı və onun havadarları üzərində Türkiyənin gücünü artırdı. Hazırkı tərk-silah prosesi isə bir neçə amillə bağlı ola bilər. Birincisi, bir zamanlar PKK-nı dəstəkləyən qüvvələr artıq ona ehtiyac duymur. Bu, bir qədər zəif ehtimaldır. Çünki təşkilat Qərbdən dəstəklənirdi.

İkinci məsələ həbsdə olmasına baxmayaraq Öcalanın hələ də PKK-da böyük nüfuza malik olmasıdır. Halbuki hazırda təşkilata liderlik edən Murad Karayılan vasitəsilə Öcalan tərəfdarlarının idarəçilikdən uzaqlaşdırılması prosesi gedir. Karayılan və ona bağlı qrup Öcalanın PKK-dakı nüfuzunu azaldıb onu "simvolik lider"ə çevirmək istəyirdi və qismən buna nail oldu.

Üçüncü variant isə Türkiyənin PKK-nı küncə sıxışdırması və təşkilatı bütün imkanlardan məhrum etməsidir. Türkiyə Ordusunun əməliyyatları qruplaşmaya ağır zərbə vurub. Həmçinin PKK-ya qoşulmaların qarşısı alınıb.