Ukrayna Prezidentindən Miladla bağlı müraciət

"Bu gün biz torpağımızı, ailələrimizi, evlərimizdə arzuladığımız sülh və əmin-amanlıq hissini müdafiə edirik və hər şeyə rəğmən, bu gün bir yerdəyik".

Bunu Ukrayna Prezidenti Volodimir Zelenski Milad bayramı müraciətində deyib.

"Rusiya milad gecəsində yüzlərlə dron və raketlə kütləvi hücumlar təşkil etməklə bir daha kim olduqlarını göstərdi. Xristianlıqla və ya insanlıqla heç bir əlaqəsi olmayanlar belə hərəkətlər edirlər. Ukraynalılar uzun müddətdir ki, Milad gecəsində göylərin açıldığına inanırlar. Əgər arzularınızı göyə danışsanız, bu, mütləq gerçəkləşəcək. Bu gün hamımızın bir arzusu var və hamımız Ukrayna üçün sülh diləyirik", – deyə Zelenski bildirib.

Bu arada, Rusiya Ukraynada müharibənin başa çatdırılması üçün ABŞ-nin təqdim etdiyi sülh planının son versiyasına dəyişikliklər edilməsinə çalışacaq. Bu barədə “Bloomberg“ agentliyi məlumat yayıb.

Məlumata görə, Kreml Ukrayna Silahlı Qüvvələrinə dair daha sərt məhdudiyyətlər, eləcə də sanksiyalar və dondurulmuş Rusiya aktivləri ilə bağlı məsələlərin həllini tələb edir. Kremlə yaxın mənbənin nəşrə bildirdiyinə görə, Rusiya hazırkı sülh planını başlanğıc nöqtə kimi qiymətləndirir.

"Moskva Ukrayna və ABŞ arasında hazırlanmış 20 bəndlik planı, Rusiyanın maraqları üçün vacib olan bir sıra müddəaların orada yer almaması və bir çox suallara cavab verməməsi fonunda, sonrakı danışıqlar üçün başlanğıc nöqtə kimi nəzərdən keçirir", – deyə mənbə qeyd edib.