Ukrayna Rusiyanın neft bazasını darmadağın etdi | MN-dən təcili açıqlama

Rusiya ərazisi dekabrın 10-dan 11-nə keçən gecə yenidən Ukrayna Silahlı Qüvvələrinin atəşinə məruz qalıb.

Gecə ərzində ölkənin Hava Hücumundan Müdafiə Qüvvələri Bryansk vilayəti üzərində 14 PUA məhv edib.

Bu barədə Rusiya Müdafiə Nazirliyi məlumat yayıb.

Bildirilib ki, Kiyevin təyyarə tipli PUA-larla planladığı terror aktının qarşısı alınıb.

Ölkə mətbuatında yer alan məlumatlarda qeyd edilib ki, Bryansk vilayətində yerləşən “Transneft” korporasiyasına məxsus neft bazası PUA hücumuna məruz qalıb, sakinlər partlayış səsləri eşidiblər. Hava Hücumundan Müdafiə Qüvvələri işə düşüb. Zavodun ərazisində yanğın başlayıb.

Qubernator Aleksandr Boqomaz açıqlamasında bildirib ki, Bryanskda dron hücumu nəticəsində istehsalat obyektində alışma olub. Ukrayna Müdafiə Nazirliyi məlumat paylaşaraq hadisəni təsdiqləyib.

“Ukrayna Silahlı Qüvvələrinin Pilotsuz Sistem Qüvvələrinin bölmələri və Ukrayna Müdafiə Nazirliyinin Baş Kəşfiyyat İdarəsinin bölmələri Rusiya Federasiyasının Bryansk vilayətində neft bazasına zərbələr endirib”, – deyə məlumatda bildirilib.

Belqorod vilayətinin qubernatoru Vyaçeslav Qladkov isə “Telegram” kanalında bildirib ki, Ukrayna tərəfindən vilayətə ən azı 25 PUA atılıb, onlardan əksəriyyəti havada zərərsizləşdirilib.